Rithöfundasjóður, Leiklistarsjóður, Tónskáldasjóður og orð ársins
Á þrettándanum, þann 6. janúar, voru menningarviðurkenningar RÚV afhentar í Efstaleitinu við hátíðlega athöfn. Við sama tækifæri var einnig tilkynnt hvaða orð var valið orð ársins 2015 í kosningu sem RÚV, Árnastofnun og Mímir, félag stúdenta í íslensku og almennum málvísindum við Háskóla Íslands, standa saman að. Þá var Króknum úthlutað, verðlaunum fyrir framúrskarandi lifandi flutning árið 2015.
Verðlaunahafar
Auður Jónsdóttir hlaut viðurkenningu Rithöfundasjóðs Ríkisútvarpsins fyrir ritstörf. Sjá lista yfir verðlaunahafa fyrri ára á vefnum bokmenntir.is
Fjórir styrkir voru veittir úr Leiklistarsjóði Þorsteins Ö. Stephensen við Ríkisútvarpið. Að þessu sinni var auglýst eftir handriti að frumsömdu útvarpsleikriti og handriti að frumsömdu leiknu sjónvarpsefni. Alls bárust 93 umsóknir. Þar af 29 fyrir útvarpsverk og 64 fyrir sjónvarpsverk.
Þrír styrkir voru veittir fyrir handrit að útvarspleikriti:
Heiðar Sumarliðason fyrir handrit að útvarpsleikritinu Iðraólga.
Kristín Eiríksdóttir fyrir handrit að útvarpsleikritinu Illa leikið.
Salka Guðmundsdóttir fyrir handrit að útvarpsleikritinu Eftir ljós.
Einn styrkur var veittur fyrir handrit að leiknu sjónvarpsefni:
Hafsteinn Gunnar Sigurðsson og Halldór Halldórsson fyrir handrit að leikinni sjónvarpsþáttaröð sem ber nafnið Afturelding.
Á síðasta ári voru veittir 46 styrkir úr Tónskáldasjóði Ríkisútvarpsins. Styrkirnir eru veittir til að semja ný sinfónísk tónverk, kammerverk, verk fyrir einstök hljóðfæri, kórverk, hljóðritun íslenskra tónverka o.fl. Sjóðurinn er gegnumstreymissjóður og því er heimilt að úthluta innistæðu hans eins og hún er á hverjum tíma. Síðasta úthlutun var í árslok 2015. Tónskáldasjóðurinn hefur verið starfræktur í meira en 60 ár. Að honum standa Ríkisútvarpið og STEF.
Hljómsveitin Agent Fresco hlaut Krókinn 2015 – viðurkenningu Rásar 2 fyrir framúrskarandi flutning á árinu og var rökstuðningur fyrir verðlaununum eftirfarandi: Agent Fresco gaf út stórgóða plötu í ágúst á þessu ári og hefur verið dugleg við að fylgja henni eftir. Hljómsveitin tók Airwaves hátíðina með trompi og sennilega voru það tónleikar þeirra á miðvikudagskvöldinu í beinni útsendingu á RÚV og Rás 2 sem vöktu mesta athygli og voru tvímælalaust með bestu tónleikum hátíðarinnar.
Orð ársins
Fössari var valið Orð ársins 2015. Valið fór fram í opinni vefkosningu á ruv.is og þetta er í fyrsta sinn sem slíkt val fer fram. Valið stóð um tíu orð sem þóttu endurspegla umræðuna í þjóðfélaginu á liðnu ári : deilihagkerfi, dróni, fössari, góða fólkið, grænkeri, hópfjármögnun, lundabúð, matarsóun, núvitund og rafretta.